首屆馬來西亞國際電影節於雲頂舉行，有資深演齡的女星葉蘊儀獲邀與金馬執行長聞天祥齊為電影節擔任顧問團。而電影節更請來馬來西亞演員、金馬影后李心潔則為電影節擔任宣傳大使，釜山國際電影節創辨人金東虎則擔任評審主席，其他評審團包括來自德國的導演 Mr. Andreas Dresen、來自臺灣的監製葉如芬小姐丶來自印尼的導演 Mr. Garin Nugroho丶來自馬來西亞的女演員楊雁雁小姐以及中國的謝飛博士。

志偉奪最佳男演員

金環獎頒獎禮當晚，不少香港知名影星亦有亮相，包括曾志偉、張同祖、惠英紅、黃秋生、金燕玲、楊怡及吳卓羲等，志偉更在晚會中勇奪「最佳男演員」大獎，獲得台下朋友報以歡呼聲鼓勵，而特別獎項「終身成就獎」則由馬來西亞國寶級演員黎明奪得。

認真畀意見評審

葉蘊儀接受訪問時，談到自己受邀的原因，她謂：「因為我之前有部電視劇，喺新加坡、馬來西亞度播，近年又專注藝術嘅嘢，所以大會覺得我好適合做顧問，可以畀到好多方面嘅意見佢哋。由於今年係第一屆，整個過程都係好多摸索嘅階段，而令我最估唔到嘅係，短片環節係有好多人參加，我哋收咗五千幾個唔同國家嘅短片，咁我亦有做短片環節嘅評審，可以睇到唔同國家拍嘅唔同嘅短片，佢哋表達嘅嘢真係好唔同，而評審團亦都好專業，佢哋對每一套戲嘅導演都好熟悉，會好有心機咁去討論。」

設計金環獎獎座

而今次金環獎的獎座亦是由葉蘊儀去設計，她謂：「我之前做咗好多資料搜集，金環獎獎座設計概念係由我諗出嚟，所以見到獎座嘅時候好開心，因為係自己一手一做出嚟，好感動！」

每日似坐過山車

第一次為大型活動任顧問，葉蘊儀指自己好緊張，到馬來西亞工作一星期，感覺好像去了很久，她謂：「因為太多突發事會發生，嚟咗一個禮拜，但感覺好似好耐咁，亦可能因為都籌備咗好耐。（有乜難忘事？）心情其實每一日都好似坐過山車咁，最難忘係好擔心紅地氈儀式時會落雨，因頒獎禮當日上午都落緊雨，擔心如果行紅地氈時都落雨，唔知點算，好彩最後都冇落到。」